Ó B Grandmasterson bauð okkur foreldrum sínum og bróður á Taekwondo sýningu á fimmtudaginn sem var mikið gaman. Krakkarnir sýndu kúnstir, brutu og brömluðu ýmislegt sem fyrir þeim varð og sýndu hvað þau eru þrátt fyrir það öguð og frámunalega dugleg. Til að fjölskyldan gæti deilt þessari sýningu með okkur setti ég saman smá víðjó.



Þessi sem missir sig gjörsamlega í restina er aðaldúddinn í Taekwondo-inu og er norskur að uppruna. Hann heitir því ofurhetjulega nafni Gulleik og ég geri ráð fyrir að systir hans heiti Boris... grín.

Ekki rétti maðurinn til að gera gys að held ég...

Í gærkvöldi kl. 19.15 fékk orðið Svíagrýla nýja merkingu fyrir mér. Nú veit ég loksins hvernig hún lítur út þessi svíagrýla sem alltaf er verið að tala um. Og hún ku heita Charlotte.

Herre gud, nú þarf ég eiginlega að skipuleggja skrepp til Dalvíkur. Ekki bara til að missa mig yfir schlager-festivalen eins og allir heldur líka til að fagna með Vigga frænda sem er að útskrifast á morgun. Spurning með að gerast boðflenna og skunda til Dalvíkur.

Vona að mér verði veitt tilfinningalegt svigrúm með ÁFRAM FRAKKLAND skiltið mitt.

Þykist bara vera Ólafsfirðingur...

Sko hvað ég á fínan Píp! Ber af í flottu fötunum sínum á hægri kantinum. Hér eftir, eða allavega næstu þrjár vikurnar eða svo, verður hann ekki kallaður neitt annað en Grandmaster Píp á þessari síðu og vonandi hvar sem hann fer um.

---

Hvernig ætli Barbie-stráknum og mömmu hans eigi eftir að ganga í júró þegar það fréttist að hinir hræðilegu íslendingar séu aftur farnir að kvelja hvali. Hvað á þessi tímasetning að þýða? Ég hef áhyggjur af þessu. Verð að segja það.

Það nýjasta að frétta annars er að árið 1999 hringdi og vill fá lagið sitt aftur. Og íhugar að fara í málsókn.

Áfram Frakkland!

... komin út og hallelúja! Hallelúja hallelúja hallelúja!!!!!!!!!

Eftir ellefu ára gegndarlausa viðþolslausa bið er þriðja plata Portishead komin út. Fyrst breytti heimurinn um lit þegar "Dummy" kom út og svo breytti geimurinn um svip þegar "Portishead" kom út.

1998 kom svo "PORTISHEAD roseland nyc live" út og minnti mann á af hverju þessar breytingar á heimsmyndinni urðu.

nine-eleven hvað?

Núna um daginn kom svo út platan sem heitir einfaldlega "third" og heilögguðsmóðirogallirhennarafkomendur er biðarinnar virði. Hafði heyrt því fleygt að platan sú arna væri þyngri en fyrri verk Portishead en gjet svo svarið það, heyri ekkert nema englasöng í hverjum tóni stykkisins. Ég og Portishead hljótum að vera frá Vúlkan, slík er tengingin og hefur verið síðan 1994. Það sem gladdi mest er að á plötunni má heyra 11 ára þróun, það er ekki eins og þau hafi búið til einhvern bræðing úr fyrri meistaraverkum heldur er hún nákvæmlega eins og Portishead - 11 árum seinna.


Lýsi hér með yfir vilja mínum til að bíða til ársins 2024 eftir fjórðu plötunni. Byrjuð að hlakka til...

Fyrstu 2 lögin (jú þau eiga nöfn; 1. Silence og 2. Hunter) eru top of the pops á plötunni og líka 4. The Rip, 6. We Carry on, og 5. Plastic (nokkur trommusóló í því sem vara í 1,5 sek. hvert - snilld útaf fyrir sig) og Machine Gun nr. 8 og svo videre.....), Vel að merkja lag nr. 3 er eina lagið sem ég hef spólað yfir, er sennilega ekki í réttri tíðni fyrir mig eða árurnar okkar ná ekki alveg saman. Sum lög þarf maður bara að heyra oftar en önnur til að læra að meta og svo gæti það endað sem uppáhald seinna meir en það er önnur saga...

Húrra fyrir Portishead.
Og til að auka á gleði mína get ég kannski farið að halda með Bristol í enska því þeir eru vonandi á leiðinni upp í úrvalsdeildina. Portishead eru jú frá Bristol. Geri ráð fyrir að "Sour Times" sé félagssöngur Bristol.

Yfir og út.

Þeir gleymdu mér aftur!

Eins gott að þessir litlu undurfögru mistannlausu englar gerpi séu orðnir ágætlega sjálfala, held ég sé bara farin út að valhoppa eða gera eitthvað í þágu sjálfrar mín. Það eldra getur allavega aðstoðað hið yngra fyrst þeir kunna ekki að meta allt sem EINA MÓÐIR ÞEIRRA gerir og hefur gert fyrir þá í gegnum tíðina!!!!

Baggalútar eru algjörir snillingar eins og oft hefur komið fram. Sem kunnugt er sérhæfa þeir sig í að snúa út úr fréttum og finna annan, jafnvel fáránlegan, vinkil á málum eins og hér má sjá dæmi um. En nú gerðist það að þeir þurftu bara ekkert að snúa út úr ákveðinni frétt. Hún kom bara til þeirra fullsköpuð úr munni ákveðins vitrings í þjóðfélaginu. Allir útúrsnúningar óþarfir og skipanirnar copy og paste allt sem þarf. Þetta er nú bara það sem greyið sagði. Sé allavega ekki mikinn mun á þessari útgáfu og rúv-útgáfunni.
Vei okkur er borgið með svona menn við stjórn.

Minni á að enn er hægt að bæta stöðu eigin fjár...

Vá hvað ég er að stríða píparanum núna! Búin að hakka mig inn á síðuna hans og það í tvígang og setja inn myndir af honum sjálfum án hans vitundar. Mohohohohohohohoho

Hinir fótboltadúddarnir halda bara að hann sé í góðum fíling að spá í nýju lúkki og allt að gerast.

Vona að þessi færsla sé ekki mitt síðasta blogg, því fótboltabullur eins og píp eru stoltar og geta látið hnefana tala þegar trampað er illilega á árunni þeirra.

Ef hann hefur ekki húmor fyrir þessu þá þakka ég bara fyrir mig í gegnum árin...

Hvað gerir maður ef staða eigin fjár er ekki sem best. Nú, maður verður sér bara úti um meira eigið fé á einfaldan hátt hér!

Það er mjög í tísku núna hjá fræga fólkinu að ættleiða börn frá framandi löndum. Eftir mikla umhugsun fannst okkur Píp við þurfa að leggja okkar af mörkum og gera slíkt hið sama. Við gerðum eins og Madonna og Angelina og fengum okkur fylgihlut sem er flottur á litinn og fær okkur til að líða vel með okkur sjálf og finnast eins og við höfum gert gagn svona í alheimslegu ljósi. Fyrir valinu varð einstaklingur frá þriðja heims ríkinu Bandaríkjunum (þið vitið rétt fyrir neðan Kanada) og kom hann til landsins nú fyrir páskana. Hann stenst allar vonir; er léttur, kátur og hláturmildur með eindæmum og vekur gleði hvar sem hann fer.

Hérna má sjá nýjasta fjölskyldumeðliminn:
(Hafðu hljóðið á til að þú getir heyrt hann tjá sig á frummálinu)

Þetta er snilldarhús. Ef ég mundi kaupa það mundi ég umsvifalaust breyta nafni mínu í Línu af ætt langsokka, fá mér apa og eitt hross í garðinn. Svaka krúttaralegt hús og þar gera svo sem gólffjalirnar útslagið. Litavalið er rosa fjörugt en græni liturinn í forstofunni er geggjaðastur í jákvæðri merkingu þess orðs. Það sem mér finnst þó mesta snilldin eru "svalirnar" á bakhlið hússins.

Ef kallinn er leiðinlegur þá segir maður bara: “Æiji góði farðu bara út á svalir!”

Þar kom að því að Píp færi að blogga!
Reyndar ekki einn og sér heldur í nafni bjórboltafélagsins Hómers.
Strákurinn búinn að setja inn 3 færslur og allt að gerast.

Fylgist spennt með hér!

Vá hvað ég elska þennan mann! Hann er barngóður, duglegur, ljúfur og góður. Hann er umhyggjusamur og hugsar fyrst og síðast um nánustu fjölskyldu og langflestir sem þekkja hann kunna að meta hann. Hann vinnur rosalega mikið, en ég held að það sé til að hann geti dekrað fjölskylduna meira. Hann vinnur oftar en ekki lengi fram eftir á kvöldin og jafnvel fram á nótt ef svo ber undir.
Ég veit svo sem ekkert hvað hann er að vinna svona seint en það er lýsandi fyrir dugnaðinn í honum. Börnin dýrka hann og gleðjast heil ósköp þegar hann mætir á svæðið. Hann er fjallmyndarlegur og ber af sér góðan þokka. Hvað getur maður beðið um meira í einum og sama manninum?

Dexter, viltu giftast mér?

Hólí krapp!!!

Þú bara verður að smella hér: Smelltu strax! Ef þú smellir ekki geturðu sleppt því að lesa áfram því þá veistu ekkert hvað ég er að tala um og missir af þessari dásemd í sögu fréttaflutnings í lýðveldinu Íslandi. Smelltu!
Fáheyrð snilld á ferð í kvöldfréttatíma Sjónvarps. Ef Bogi hefði ekki kynnt þetta inn hefði ég umsvifalaust ákveðið að þetta væri "skets" í fóstbræðrum eða eitthvað. Úff, beintengd Vúlkan sem er á bakvið sólina sko og allt að gerast. Svört listaverk en þeir sem eru "ættaðir" frá Vúlkan sjá liti. Og þetta sagði manneskjan bara sí svona við alþjóð og Boga eins og ekkert væri sjálfsagðara og án þess að blikna.

Vona hennar vegna að viðtalið hafi verið tekið í lok opnunarinnar og hún búin með aðeins of mikið af veitingum og ofhlaðin lofi. Spurning hvort hún sé með háloftaveiki verandi flugfreyjan sem hún er. Hún ætti nú að geta misnotað aðstöðu sína og beðið flugstjórann í næsta flugi, til dæmis á leið heim frá London, um að setja sig út á Vúlkan og halda sig svo bara heima hjá sér í litadýrðinni. Þið vitið, þarna á bak við sólina.

Og viti menn, frænka hennar er búin að gefa sig fram hér.

Ógeðslega get ég alltaf verið þröngsýn eitthvað... Ég er bara týnd í sortanum.

Þessi sjálfmjólkandi kýr minnir mig á eineygðu kýrnar sem við Píp rákumst einu sinni á, á leið okkar yfir Öxnadalsheiðina undir miðnætti ágústnótt eina í hitteðfyrra. Vorum að keyra í mesta sakleysi áleiðis til Dalvíkur þegar á heiðinni við sáum skilti sem á stóð "5 eineygðar kýr framundan".

Að sjálfsögðu hafði næturgalsinn tekið yfirhöndina því á skiltunum stóð "5 einbreiðar brýr framundan". En þetta varð til þess að við görguðum af hlátri yfir alla heiðina og minnstu munaði að Kári hefði komið í heiminn þá og þegar, allavega mæli ég ekki með að vera kasólétt upp á heiði, hossandi um í bílskrjóði, hlæjandi eins og grís að eigin vitleysu og ekki einu sinni í gsm-sambandi.