Þessi sjálfmjólkandi kýr minnir mig á eineygðu kýrnar sem við Píp rákumst einu sinni á, á leið okkar yfir Öxnadalsheiðina undir miðnætti ágústnótt eina í hitteðfyrra. Vorum að keyra í mesta sakleysi áleiðis til Dalvíkur þegar á heiðinni við sáum skilti sem á stóð "5 eineygðar kýr framundan".

Að sjálfsögðu hafði næturgalsinn tekið yfirhöndina því á skiltunum stóð "5 einbreiðar brýr framundan". En þetta varð til þess að við görguðum af hlátri yfir alla heiðina og minnstu munaði að Kári hefði komið í heiminn þá og þegar, allavega mæli ég ekki með að vera kasólétt upp á heiði, hossandi um í bílskrjóði, hlæjandi eins og grís að eigin vitleysu og ekki einu sinni í gsm-sambandi.