Múslimarnir höfðu rétt fyrir sér: hunsum allt sem danskt er!!!!!!
Djö%&$#inn danskur!

HM í handbolta í algleymingi. Þjóðin við það að ganga af göflunum í ástar/haturs sambandi sínu við landsliðið. Taldi leikinn í dag gegn Pólverjum unninn og ákvað bara að nota tækifærið og fara í Bónus þar sem ég var búin að ákveða það að ég mundi hafa búðina útaf fyrir mig þar sem Íslendingarnir væru heima að horfa á leikinn og Pólverjarnir líka. Get svo svarið það búðin var bara full af Pakistönum í staðinn.
Það er greinilegt að það er algjörlega nauðsynlegt að ég horfi á leikina, horfi en ekki hlusti. Jú þegar við vorum á leið í bæinn af norðurlandinu hlustuðum við á leik sem tapaðist. Og þegar ég fór í búðina og hlustaði á eitthvað af leiknum töpuðum við, eða eins og maður segir þegar illa gengur; töpuðu þeir! Þegar ég skoða þessar staðreyndir þá er það auðséð mál að ég verð að reyna að sjá hvern einasta leik til þess að ekki fara nú að halla undan fæti hjá liðinu. Það er nokkuð ljóst samkvæmt þessu að ég er sjálfskipað lukkutröll liðsins og nú ættu einhverjir fjársterkir lesendur að styrkja mig ásamt aðstoðarmönnum (Frú Sigríði til dæmis) til frægðarfarar til Þýskalands þar sem ég mundi tryggja það að Bermúdaskálin endi á Íslandi. Gæti líka tekið að mér að aðstoða sjúkraþjálfara liðsins við hin og þessi viðvik svo sem nudda þreytt læri, syngja forsöng í þessari tímalausu snilld og fleira í þeim dúr þannig að það væri ekkert lítið gagn sem ég mundi gera.
Fjársterku aðilarnir mega gefa sig fram í commentunum takk fyrir í dag yfir og út.

ÓBG hefur heldur betur aukið orðaforða sinn undanfarið. Það nýjasta var að hann var farinn að segja "sjitt" í tíma og ótíma, eitthvað sem við foreldrarnir bentum honum kurteislega á að væri ekki fallegt orð og bæri ekki að nota. Einn daginn koma hann svo heim og sagði stoltur að hann væri búinn að finna nýtt orð til að segja í staðinn fyrir sjitt. "Nú, hvaða orð er það?" sagði pabbi hans. "Fokk!" sagði kauði stoltur.

Haldinn var fjölskyldufundur í skyndi og farið yfir málið með honum.

Trúi því ekki að ég sé að blogga um þau, en svona er fólk ánægt með að fá The Beckham's til Hollywood:

Þetta ágæta egósentrískasnobbaðaillatalanditilgerðarlegafrægtfyrirekkineitt merkis fólk ætti að kunna ágætlega við sig þarna meðal jafningja sinna og finna sína Beckingham Palace. Óttast hins vegar að (ekki)fréttum af þeim og þeirra upátækjum eigi ekki eftir að fækka í kjölfarið. Romeo flogaveikur og svona, það má sennilega gera sér mat úr því í nokkra mánuði og eins þegar eitthvað baðfatamódel kemur fram og lýsir ítarlega heitum stundum þeirra Davids saman. Þó hann leiti aðeins út fyrir garðinn sinn þegar hann er alltaf með einhvern ísklump mótaðan af manna höndum með fastan stút á munni upp í rúmi hjá sér... hva. Þori þó ekki að spá fyrir um hvort viðkomandi baðfatamódel verði karlkyns eða kvenkyns...

Er ég ennþá að tala um þau???
Ókei myndin er góð og hún réttlætir þessa færslu!

Það er ekki tekið út með sældinni að vera hross greinilega. Hef aldrei þolað hvernig sumir hestamenn tala um og koma fram við bykkjurnar sínar eins og þær séu dauðir hlutir, '84 árgerð af Trabant eða eitthvað.
Svona hófst frétt af sviplegu andláti eins elsta hross landsins, Blakks frá Höfðabrekku (38) í Fréttablaðinu í gær:


Lélegur og lítið notaður! Mundi ekki tala svona um hjólið mitt! Hnussss!

Á föstudaginn fór ég með ÓBG á fótboltaæfingu í Höllinni, einu sinni sem oftar, og á sama tíma var karlalandsliðið í handbolta að skottast í salnum og hélt svo blaðamannafund. Ákvað að fórna mér og horfa nú á þessa æfingu með honum Óla mínum og vera honum til halds og trausts.
Sú staðreynd að þarna voru saman komnir tuttugu fílelfdir karlmenn í myndarlegri kantinum hafði engin áhrif á þessa ákvörðun mína. Ó nei af og frá! Óli á það alveg skilið að mútta horfi á hann endrum og eins. Það var samt óneitanlega hressandi þegar þeir sviptu sig úr landsliðstreyjunum allir sem einn að blaðamannafundinum loknum....

Úfff... verst þeir voru í einhverjum bolum og svoleiðs óþarfa innan undir. Landsliðið vantar klárlega stílista og ég skal bjóða mig fram!

P.s. ef einhver sá í blöðum helgarinnar mynd af landsliðsgaurunum og hóp af strákum í hvítum bolum fyrir framan þá, þá er ÓBG einn af þeim.

Eftir erfiða vasaklútahelgi sit ég hér með grátbólgin augu og átta mig á að þetta er staðreynd! Þetta er ekkert grín! Þetta er ekki lélegur brandari sem ég las í Samúel.
Magni er ski.... *skælsnökt* skilinn! Ég sem hélt að hann og his ears (Eyrun) væru alveg yfirmáta frámunalega ástfangið fólk sem sæji meðal annars ekki sólina í LA fyrir hvoru öðru. En bara sisvona eins og hendi sé veifað er allt í upplausn, ástin gufuð upp og Marinó orðinn skilnaðarbarn! Nú held ég að Tommy Lee sé leiður. Fínu húsgögnin úr Egg verða söguð í sundur og veggfóðrið rifið í tvennt. Og hugtakið ást endurskilgreint í orðabókum.

Hvað gerir maður þegar svona voveifleg tíðindi berast??? Maður kannar hvað hinar rætnu tungur á heimasíðu miðstöðvar illa haldinna blaðurskjóðna sem eru alveg að ná tökum á fæðingarþunglyndinu en gengur verr með hinar skapsveiflurnar (barnaland.is) segja! Jú þær segja að Magni og vinkonan úr Rokkstar, hún Dilana, séu par! Herre gud. Þá fann ég mig knúna til að leggjast í smá heimildavinnu og kanna þetta aðeins betur og leit sem snöggvast inn í framtíðina og gúgglaði árinu 2032. Viti menn, fékk upp nokkrar myndir af áðurnefndum Magna (eftir hárlengingu og sjónpróf) og Dilönu (varð leið á dreddunum eftir að hún fann kettling í þeim sem hún nefndi svo Storm) að skemmta saman. Það fylgdi þó ekki sögunni hvort þau væru á þessum tímapunkti, eða hefðu einhverntíman verið par eða bara saman í bandi.
Myndirnar er óneitanlega skemmtilegar og sýna að þau munu engu hafa gleymt árið 2032:

M & D að tralla saman Radiohead slagarann "Creep".

D í miðju sólói.

Koma svo krakkar, rokkum aðeins.

"Let me stand next to your fire...". Áhorfendamergð á svæðinu.

"Only youuuuuu..." í pönkrokk útsetningu.

Allt að verða vitlaust í lokalaginu sem var "Smells like teen spirit".

Skjámynd á tölvuna.

Gaaarg! Ég gleymdi að taka þátt í Lottóinu. Æji ég hefði hvort sem er aldrei valið þessar tölur.