MIG LANGAR Í iPHONE MEST Í HEIMI!

Þvílík snilldar græja! Horfi girndaraugum á vinnufélaga mína sem eiga soleis, ekki þó á þá heldur símana þeirra. Ekki hægt að kaupa svona á Íslandi samt og það þarf víst sérstaklega að brjótast inn í þá til að nota hér. Kjánalegt dæmi og vona að það breytist fyrr en seinna. Þarna hefði maður músíkina sína, myndir ef maður vill og allskonar möguleika eins og til dæmis þennan:


Já það er gítar í símanum! Þyrfti þá ekki lengur að blístra gítarsólóin. Hentugt.

Jæja koma svo Apple fólk - selj'ann hér takk án vesenis og kvaða... plíííís.

Brúðguminn er æði! Fór á hana í síðustu viku eftir að hafa heyrt hverja lofræðuna á fætur annarri og varð svona líka kát með hreyfimynd þá arna. Fyrir það fyrsta fær íslenska sumarið loksins það sem það á skilið í bíómynd, það er að segja sumarnæturnar stela senunni. Lítið fer fyrir skrafrenningi, vosbúð og annarskonar kvillum sem hrjáð hafa margar íslenskar myndir í gegnum tíðina, en að sjálfsögðu er þarna staðalbúnaður og meginuppistaða íslenskra mynda fyrri ára, eins og geðveilur, fyllerí og allsber Hilmir Snær.

Maður verður reyndar grænn og gulur í eftirvæntingu eftir sumrinu enda sumarnætur á Íslandi bestar í heimi en að sama skapi virkar myndin eins og orkubúst á myrku snjóþungu febrúarkvöldi. Ef þú ert ekki búinn að fara farðu þá strax!

Flatey í hlutverki sjálfrar sín, húrra fyrir hönnuðinum!

Það er gott að búa á friðsælu landi! Svona leit forsíðan á mbl út laust eftir hádegi í dag:



bumbulíus gvag gvag

Kallinn Píp á ammæli í dag. Orðinn 30+ og miður sín eftir því. Gaf honum síams-svefnpoka og bakaði handa honum köku:


Hún hressti hann nú ekkert sérstaklega þó ég hafi gert tvöfaldan skammt af kremi...

Æ hvað ég vildi að ég væri atvinnulaus auðnuleysingi og gæti helgað Facebook eða Smettisritinu daga mína hér eftir. Gekk til liðs við Smettisritið í fyrradag og nú þegar er ég búin að finna glataða (týnda) frændann í Sveríki, orðin "Music Genius" í tónlistaráskorun, veit að lífsnúmerið mitt er 8, get spilað Tetris þangað til ég dett niður lífinu styttri, fá 10 á "hvaðveistuumteiknimyndir"-prófi, á 7 vini og fleiri á leiðinni ef þeir samþykkja mig og ef ekki er mér að mæta, og veit allt um hvað þessir samþykktu vinir eru að bralla og búin að smíða kort sem sýnir hversu víðförul ég hef verið til þessa. Úff hvað ég get gert margt í viðbót, lífið er leikur á Facebook. Og já svo er búið að kaupa mig á 1 dollar, af mágkonu minni! Ætli hún sé ekki að hefna sín síðan hún var seld fyrir andvirði sex mjólkandi kvíga, þriggja hænsna, tveggja rollna og endalausra eggja á hverfispöbbnum útí London um daginn. Það voru Írar sem gengu að tilboðinu nota bene. Fyrsta - annað - þriðja - SELD!

Til að sjá smettisrits-síðuna mína þarftu reyndar að byggja þinn eigin aðgang, þannig að þangað til þú gerir það ertu alveg glórulaus um hvað ég er að aðhafast þar.

En þó þykir mér verst að ég næ ekki fyrir nokkra muni að leysa vandamál Kenýa þó ég glöð vildi. Það er enginn hnappur í stillingunum sem gerir mér það kleyft. Líkar ekki að þessi yndislega hamingjusama og káta þjóð sem samanstendur af ættbálkum eins og títt er með þjóðir þar syðra, ætli að snúast gegn hvorri annarri og búa til eitthvað Rúanda ástand. Þetta brosandi fólk sem bjó í meðaldúfnakofum og föndraði sín eigin skilti á kofana sem á stóð "Grand Hotel Plaza Appartments" og bjó þar hamingjusamt með sín 7 börn og vissi ekkert hvað morgundagurinn bæri í skauti sínu. Vil ekki sjá myndina Hotel Rwanda endurtekna eftir 9 ár heldur vona ég að úr leysist og endirinn verði góður.

Ábending til fjölmiðla: við segjum Kenýa en ekki Kenía. Yppsilon takk! Landið heitir Kenýa takk fyrir með eða án kommu. Skemmtilegt frá því að segja að þessa síðu útbjó ég einmitt þegar ég var í VT 2001 og tók FrontPage áfanga.


VT er alltso hvorki ViginiaTech háskólinn þar sem voveifleg morð áttu sér stað né heldur Vörutorg heldur Viðskipta- og tölvuskólinn. Þannig að það sé á hreinu.

Óli byrjar í dag á frístundaheimili eftir skóla (áður þekkt sem skóladagheimili). Við sóttum um í febrúar á síðasta ári. Hann hefði með réttu átt að komast inn í lok ágúst þegar skólinn hófst.

Ef einhver þessara borgarstjórnarmeirihluta hefði nú sinnt borgarmálunum...

Sonur minn eldri er frelsarinn endurfæddur! Í jeppaferð um síðustu helgi spurði hann:
"Er snjór ekki vatn?"
"Jú" fékk hann í svar.
"Þá geng ég á vatni!" sagði hann hróðugur og hélt áfram eftir skaflinum.

Kötturinn Fritz snillingur mikill! Hann heldur úti heimasíðu hvar hann sýnir myndir frá flakki sínu um heimahagana. Hann er með myndavél um hálsinn sem smellir af á 15 sekúndna fresti og afraksturinn má sjá hér.

Minn köttur er inniköttur þannig að ég geri kannski ekki mikið meira við hann en að festa á hann iRobot-ryksugu þannig að hann sjá til þess að heimilið verði ryksugað á u.þ.b. 15 klukkustunda fresti. Afraksturinn yrði hreint heimili. Hann gæti meira að segja fengið eigin heimasíðu út á það.

Hann Heath Ledger er dáinn.

Ekki er ég vön svona í seinni tíð, eða síðan River Phoenix safnaðist til feðra sinna, að missa mig yfir andláti sjálfseyðandi dópbryðjandi Hollywoodgimpa en þarna fór góður drengur! Enda ekki Hollywoodískur að uppruna heldur Ástrali eins og Frú Sigríður benti réttilega á.
Þessa mynd hér að neðan tók ég á símann minn af sjónvarpsskjánum þegar ég á sínum tíma sat alein heima að horfa á Brokeback Mountain. Málið var að Píp hafði svo mikla andstyggð á myndinni óséðri, vegna meintra aðróttana í garð kúreka eins og hans sjálfs, að hann kaus að yfirgefa heimilið þegar ég fór og leigði hana. Enda hómófóbísk tepra að upplagi. En ég fann mig engu að síður knúna til að senda honum þessa mynd af Jake Gyllinæð og Heath Legend (núna) að aðhafast þennan koss enda huggulegur koss í meira lagi.

Skemmtilegt frá að segja að til baka fékk ég senda mynd af Píp og ákveðnum æskuvini karlkyns í álíka atlotum en það er sossem leyndó sem við skulum alveg láta kjurt liggja.


Allavega, hefði viljað hafa hann Heath meðal vor lengur því hann átti mikið inni vil ég meina.

Britney hins vegar virðist eiga fjárans 50 líf, sorpið sem hún er.

Nú er spurning hvort Ólafur tapi heilsunni, verði borinn útaf með slitinn stokk og settur í mislæg gatnamót. Og þar með búið spil.

Þú mátt ráða hvort ég er að tala um handbolta eða pólitík.

Halló halló halló halló halló ... (bergmál) Er einhver lesandi eftir þarna??? Eru allir kannski löngu búnir að gefast upp á mér og farnir að lesa Ellý?

Nei adnsktoinn ykkur leiðist ekki svo mikið er það?

GLEÐILEGT ÁR OG TAKK FYRIR HIN FYRRI!

2008 mætt á svæðið og lofar góðu af því að 2+0+0+8 gera 10 og 1+0 gera 1 sem hlýtur að þýða að þetta verður ár númer uno, fyrsta flokks ár! Takk fyrir það kærlega.

Þó síðan hafi legið niðri vegna framkvæmdaleysis þá "örvæntið ekki því það gerum við" eins og segir í auglýsingunni. Vona að ég komi til baka tvíelfd og gefi mér tíma í eitthvað bull og raus á næstunni.

Glöggir lesendur sem eru búnir að lesa síðuna upp til agna í pásunni hafa væntanlega rekið augun í að ég er þó búin að setja myndir frá Londres inn á Flickrið, en ef það hefur farið fram hjá ykkur má sjá þær hér. Þetta eru reyndar mest megnis myndir af Lundúnaborg sem slíkri þar sem ég var á ferð með frekar myndavélafóbísku fólki sem sneri sér listilega undan þegar ég tók upp mína ofurhægu digitalísku myndavél. Þessa myndavél gaf fólki að vísu á að giska 21 sekúndu til að koma sér undan því yfirleitt tók við 22 sekúndna bið eftir að myndin yrði rist í kortið frá því maður ýtti á hnappinn. En það er önnur saga. Ég náði þó nokkrum afturhlutum þannig að ég get þó sannað það að einhverju leyti að ég hafi ekki bara verið í einkaerindum að stúdera arkitektúr Lundúna.

Hér er svo ákaflega skemmtilegt myndskeið sem ég hvet alla til að skoða. Í því sé ég bæði hann Bjart eðalfress og undir lok myndbandsins kemur hann Kári minn líka upp í hugann einhverra hluta vegna...

=^._.^=

Það er búið að endurútgefa biblíuna og ég fékk eintak í jólagjöf.

Nýja útgáfan lítur svona út:

Hún er full af heimalagaðri siðfræðilegri speki um lífið, textinn aðgengilegur þannig að hann höfðar vel til nútímafólks og einnig er talað um í þessari uppfærðu útgáfu að súkkulaðifíkn sé eingetin einkadóttir sælgætisfíknar og háheilög í meira lagi. Einnig kveður þessi nýja útgáfa á um að Ben & Jerry séu Þéraðir sem Guðir væru.

En eins og allar bækur hefur hún veikan punkt og það er kaflinn um ávexti. Við skulum hafa það á hreinu að ávextir eru forboðnir. Þið vitið aldingarðurinn og allt það! Mjallhvít líka. Maður dettur niður dauður af ávöxtum og grænnmeti endalaust! Maður hefur ekkert upp úr grænmetisáti nema stöku höggorma og annars konar misyndis-skordýr.

Boðorðunum var svo fækkað niður í tvö til að koma í veg fyrir misskilning, rangtúlkanir og almennan þvætting sem hin 10 gátu skapað enda hljóðuðu þau svo sem upp á það sama mest megnis.


P.s. Togga þú merktir Guðmundi pakkann líka... eitthvað slegið saman hjá þér sennilega. En það er allt í lagi, hann er ennþá að reyna að beygja rörin úr steinalausa stálinu.

Til ykkar sem ekki fenguð kort (ef einhverjir voru).

Einu sinni bloggaði ég...

Það var í þá daga.