Þessi maður hefur mér alltaf þótt nett hressandi. Bestur var hann í denn á Radio X þegar sú ágæta stöð var og hét er hann stjórnaði síðdegisþætti sem bar nafnið Ding Dong ásamt meðstjórnandanum Dodde Lille. Þeir að vísu gengu í gegnum eilítið niðurlægingartímabil þegar þeir voru fluttir nauðugir viljugir yfir á 9F5M7 eða hvað sú ágæta sorpstöð heitir. Nú er þessi maður kominn í sjónvarpið á hverju kvöldi og sprellar og hvæsir og hefur gaman. Mér varð einmitt litið á hann í gærkvöldi og þá rifjaðist upp fyrir mér atvik sem varð þegar ég var að vinna í National Bank of Iceland in Rivertown. Pétur Jóhann álpaðist inn í bankann einu sinni sem oftar og var augljóslega með einhvern útvarpshrekk í gangi, hann var með símann á eyranu og var greinilega að tala við áðurnefndan Dodda og að búa til sprell.
Hann sem sagt kom að fiskabúrinu mínu með stöðumælasekt og greiðu í höndunum og sagðist ætla að greiða reikninginn; hvort það væri sem sagt ekki nóg að greiða honum! Ég nottla varð bara eins og gúbbífiskur þarna í búrinu mínu og sagði "jújú að sjálfsögðu, það dugar að greiða reikningnum...jájá...ægilega fínt...". Hann semsagt náði ekki alveg að hafa þetta neitt voðalega fyndið, sennilega af því að ég fór ekki að rökræða við hann um að hann þyrfti að greiða reikninginn en það hefði ekkert að segja að greiða honum. Þetta semsagt var stutt og laggott spaug og hann fór svo bara út. Sennilega hefur hann svo fengið ítrekun tveim mánuðum seinna varðandi ógreidd stöðumælagjöld...
Engin ummæli:
Skrifa ummæli