Smáálfar í Hafnarfirði

Hjúkk þarf ekki að fara á Hróarskeldu! Pixies ætla að koma til mín og taka nokkra schlagara fyrir mig í Kaplakrika í maí. Þvílíkur léttir! Það hefði verið alveg agalegt að þurfa að fara alla leið til Danmerkur og þurfa að drekka fullt af Tuborg og hlusta á fullt af misrosalegagóðum hljómsveitum í sól og sumri... nei þá fer ég frekar bara með strætó 140 í Hafnarfjörðinn, tjalda á fótboltavellinum og trítla mér inn á eitt stykki tónleika.

En er það ekki annars bara málið að búa til sitt eigið tónlistarfestival í sumar... Nú er svo mikið að gerast í tónleikahaldi í sumar að eiginlega ætti maður bara að koma upp tjaldbúðum miðsvæðis og flakka svo á milli tónleika... Kraftwerk, Pixies, KoRn, Incubus og Placebo; að ógleymdum The White Stripes sem ég er nokk viss um að komi á árinu þó ekki sé komin nein staðfesting á því. Æ ég veit ekki, kannski verður maður kominn með pínu leið á að búa í tjaldi frá maí fram í júlí... fyrir utan að þetta væri fjórfaldur Hróarskeldu-kostnaður og svo langar mig þar að auki ekkert það brjálæðislega til að sjá allar hljómsveitirnar, Smáálfarnir og Hvítu Rendurnar væru eiginlega alveg nóg fyrir mig . Kannski maður skelli sér þá bara eftir allt saman til baunalands...