Jedúdda mía, eru ekki bara Violent Femmes á leiðinni á klakann á sumardaginn fyrsta og spila á þeim alræmda skemmtistað Broadway! Nú fer þetta tónleikahald allt saman sennilega að komast á það stig að einhverjir fara að tapa á þessu, það er ekki endalaust hægt að flytja inn bönd er það nokkuð? Þar sem það kostar vanalega á fimmta þúsund á einn tónleik fyrir eitt fólk þarf mannskapurinn að velja og hafna og einhverjir tónleikahaldarar eiga þá sennilega eftir að tapa á ævintýrinu sínu. Nema eftirspurnin sé þeim mun meiri, Íslendingar eru nottla tónleikaóðir, það er löngu orðið ljóst.
Allavega, árið '97 (almáttugur... 7 ár síðan) þá vorum við Árný vinkona að vinna saman í bakaríinu út á Nesi og gerðum lítið annað þess utan en að halda partí og djamma og hlustuðum einmitt mikið á áðurnefnda hljómsveit Violent Femmes og höfðum gaman af. Gamanið var meira að segja það mikið að við vorum komnar langt með að skipuleggja ferð til London til að sjá VF með eigin augum. Ég hugsa að það eina sem við áttum eftir að gera var að borga blessaða ferðina, ætli bremsupípið hafi ekki átt sinn hlut í því hví það var ekki gert, eða sú staðreynd að allir okkar peningar fóru í djamm og trall og við vorum ekki alveg það fjáðar að geta látið þessa reisu verða að veruleika. Nú ætti ég eiginlega að reyna að draga hina hvolpafullu Árnýju með mér á þessa tónleika þó ekki væri nema bara fyrir það að geta látið gamlan draum rætast fyrir 10 sinnum lægri upphæð en hin reisan okkar hefði kostað.
Talandi um að vera hvolpafull. Árið 2000 ætluðum við Árný einmitt að fara á Hróarskeldu en það sem kom í veg fyrir það í það skiptið var að ég uppgvötvaði um svipað leyti og sú reisa átti að frágangast að ég sjálf var orðin hvolpafull, litli píp var sem sagt kominn undir. Þannig að ég af mínum gunguskap vildi síður fara á Hróarskeldu með aukamanneskju með mér sem hafði engan atkvæðisrétt, þannig að ég datt út úr því dæmi en hún Árný lét það ekki stoppa sig og fór með annari vinkonu sinni á hátíðina. Annars missti ég ekki af svo miklu þetta árið því þetta var hátíðin þegar Pearl Jam aðdáendur létu lífið nokkrir vegna troðnings og hátíðin varð víst hálf vandræðaleg eftir það. Það er spurning hvort ég hefði þá orðið að Perlusultu (Pearl Jam) ef ég hefði farið. Nei maður má ekki grínast með hvað sem er. Biðst forláts! Skamm!
P.s. Samkvæmt upplýsingum úr innsta hring hefur Útvarpsráð, í samráði við dagskrárstjóra RÚV, fyrirskipað að MR skuli tapa í viðureign kvöldsins í Gettu betur; þar sem áhorf þessa áður vinsæla dagskrárliðar hefur hríðfallið vegna óslitinnar sigurgöngu MR-liðsins í kepninni síðan elstu börn muna... Sanniði til!
Engin ummæli:
Skrifa ummæli